ايه هو الايمان؟

 

 الانبا زوسيما :

العقيدة القبطية الارثوذكسية..،

 الكنيسة بتاعتنا معملتش عقيدة وقالت نتمسك بيها وقالت هو ده الايمان واللي مش هيمشي عليه هنقطع راسه!؟ معملتش كده ، الكنيسة اخدت حياة المسيح وبدأت تعيشها فطلع الايمان،خدت حياة المسيح فبدأت تقولها فطلعت العقيده، لكن معملتش علم اسمه العقيده علشان يعني تبقي كنيسة معقدة ومش اي حد يفهمها وتبقي يعني متفلسفه ومتفزلكه، لأ، الكنيسة لما عاشت الايمان طلعت العقيدة، ولما عاشت المسيح طلعت الايمان، حاجه كده لوحدها، فيجي مثلا. اريوس يقول " الابن غير مساوي للاب في الجوهر ده الاب اعظم منه" !!؟ جبت دليلك منين ، يقول ده الابن بنفسه بيقول" ابي اعظم مني" الكنيسة تقول طب تعالوا نفكر في كلام اريوس يمكن احنا كنا عايشين غلط، واريوس هيصحح لنا ، تعالوا نسمع كلامه ونفهم، تيجي الكنيسه تفهم اريوس تلاقيه ملخبط، تقول لو طلع كلام اريوس صح يبقي الخلاص اللي عمله المسيح ملهوش اي قيمه،ازاي؟! الابن لو اقل من الاب يبقي الخلاص اللي اتعمل لينا غير كافي لانه يخلص ، غير كافي للفداء ، محتاج لسه حد حاجه تانيه، طب يعني ايه يعني كلام اريوس غلط،انتي متأكده يا كنيسة، قالت خدو عقلي وفكروا لازم الخلاص يكون كامل ، لازم الخلاص يكون علي مستوي الله ، ان كان اللي جانا اقل من الله يبقي الخلاص ناقص، تقوم تطلع عقيده، الكنيسة تقول بس خدوا بالكم عايزين الكلمتين دول اللي طلعوا يوضحوا ونبلورهم ، ونمسك فيهم . هي دي العقيدة، طلعت منين طلعوا من الايمان الايمان جاي منين من الحياة، اللي اتجسد ده هو الله ولو مكنش الله يبقي الخلاص ناقص فالعيشة في الكنيسة طلعت الايمان اللي ايمانه بالطريقه دي سهل يتمسك بيه، لكن اللي شوية كتب يحفظهم علشان يمتحن فيهم ويناكف الناس ويعكلن علي اخواته بيها مش هو ده الايمان، الايمان طالع من جوه اللي ايمانه كده ميعرفش يتمسك به، تسأله سؤال مش عارف اجابته يشك ويتلخبط لانه مش مؤمن ده حافظ ده مش عايش ده داخل خناقه يقولك احنا رايحين كورس العقيده. ليه؟ هتعمل ايه يقولك اهو علشان شويه العيال البروتستانت اللي في الجامعه هحفظلهم كلمتين!! انت بتدرس العقيده علشان كده . انت فهمان كده، مش هو ده الايمان ولا هي دي العقيده ، اللي زي ده ميعرفش يتمسك علشان كده اول ما حد يسأله سؤال يتنرفز ويتعصب ويشتم،،؟! مش هو ده الايمان .. الكتاب بيقول " الذي يؤمن يجب ان الذي يأتي الي الله يؤمن انه موجود ويجازي الذين يطلبونه" هيجي يجازيك علي اللي انت بتعمله هتقوله اصل كنت مسيحي كان لازم اكره بقيه الناس ، اصل كنت ارثوذكسي فاكره كل الناس ؟! مش هو ده الايمان