عندي سؤال :
هل الكتاب المقدس تنبأ
عن حدوث أوبئة مستقبلاً ؟؟!
- طبعاً ..
في العهد الجديد في نبوءة واضحة عن أوبئة ستحدث في نهاية الزمان :
"وَتَكُونُ زَلاَزِلُ عَظِيمَةٌ فِي أَمَاكِنَ، وَمَجَاعَاتٌ وَأَوْبِئَةٌ. وَتَكُونُ مَخَاوِفُ وَعَلاَمَاتٌ عَظِيمَةٌ مِنَ السَّمَاءِ."
( لوقا 21 : 11 ).
- طيب والعهد القديم ..
متنبأشي عن أوبئة ؟؟!
- تنبأ طبعاً ..
- جميل ..زي نص :
سفر التثنية اللي بيقول :
"يُلْصِقُ بِكَ الرَّبُّ الْوَبَأَ حَتَّى يُبِيدَكَ عَنِ الأَرْضِ الَّتِي أَنْتَ دَاخِلٌ إِلَيْهَا
لِكَيْ تَمْتَلِكَهَا."
( تثنية 28 : 21 ).
- يا صديقي
دي مش نبوءة ..دي عقوبة مشروطة .!
- مش فاهم ..!!
إيه الفرق يعني ؟؟!
- النبوءة ..هي إعلان من فم الله أو على لسان أحد أنبياءه
ان في شيء معين مؤكد الحدوث مستقبلاً مع شخص ما أو شعب ما ..
ودا لا ينطبق على النَص
اللي انت ذكرته في تثنية ..!!
اللي انت ذكرته في تثنية هو عقوبة من ضمن قائمة عقوبات ذكرها الله لشعب إسرائيل في حالة :
«وَلكِنْ إِنْ لَمْ تَسْمَعْ لِصَوْتِ الرَّبِّ إِلهِكَ لِتَحْرِصَ أَنْ تَعْمَلَ بِجَمِيعِ وَصَايَاهُ وَفَرَائِضِهِ الَّتِي أَنَا أُوصِيكَ بِهَا الْيَوْمَ، تَأْتِي عَلَيْكَ جَمِيعُ هذِهِ اللَّعَنَاتِ وَتُدْرِكُكَ "
( تثنية 28 : 15 ).
وبدأ ربنا - بلسان موسى النبي - يعدد لهم انواع هذه العقوبات :
"يَضْرِبُكَ الرَّبُّ بِالسِّلِّ وَالْحُمَّى وَالْبُرَدَاءِ وَالالْتِهَابِ وَالْجَفَافِ وَاللَّفْحِ وَالذُّبُولِ، فَتَتَّبِعُكَ حَتَّى تُفْنِيَكَ." !
( تثنية 28 : 22 ).
وعقوبات اخرى كثيرة ...!
- طيب ما فعلاً ربنا ضرب شعب إسرائيل بالضربات دي ..!!
- مش كلها ..!!
يعني مثلاً مشوفناش شعب إسرائيل عوقب جميعه بالسل ..!
ودا يوضح لك الفرق بين
العقوبات والنبوءات ..!
لو كل دا نبوءات كانت تحققت كلها
لأن النبوءة تسقط إذا جاء زمان تحقيقها ولم تحدث ..!
هل انت ترضى إنك تقول للناس
إن دي نبوءات فيسألوك :
" طيب تحققت فين أو إمتى "!
فتضرب لخمة وتسكت خالص
وتنسب لكتابك عدم المصداقية
مع إنها مش نبوءات أصلاً بل عقوبات
لمن لن يلتزم من اليهود بوصايا الله ؟!!
- لا طبعاً مرضاش ..!
بس انت قلت ان العهد القديم تنبأ عن حدوث أوبئة ..؟!!
- ايوه فعلا. ..
بس مش النص اللي انت ذكرته .
آدي نص بيتكلم عن وبأ :
"قَدْ دُفِعَتِ الْمَدِينَةُ لِيَدِ الْكَلْدَانِيِّينَ الَّذِينَ يُحَارِبُونَهَا
بِسَبَبِ السَّيْفِ وَالْجُوعِ وَالْوَبَإِ، .."
( أرميا 32 : 24 ).
بس دي نبوءة تخص اليهود فقط ..
وملهاش علاقة بوباء عالمي ..
- تمام ..
نييجي للعهد الجديد ..
في أحد الآباء الكبار قال ان نبوءة :
"لأَنَّهُ تَقُومُ أُمَّةٌ عَلَى أُمَّةٍ
وَمَمْلَكَةٌ عَلَى مَمْلَكَةٍ، وَتَكُونُ مَجَاعَاتٌ وَأَوْبِئَةٌ وَزَلاَزِلُ فِي أَمَاكِنَ."
( متى 24 : 7 ).
مقصود بها كورونا ..!!
وآدي نص ما قاله :
" كما أنبأ الكتاب عن هذه الضربات في العهد القديم ، أنبأ كذلك عنها
في العهد الجديد ..!!
إن حدوث هذه الأوبئة ومن ضمنها وباء كورونا بهذه الخطورة مع البشرية يبرهن على غضب الله ، وتحقيق لنبوءات الكتاب المقدس وتصديق وصحة لكل ما جاء به من نبوءات وتعاليم إلهية موحى بها منه " !!!
( إنتهى الإقتباس )
إيه رأيك بقى ؟؟!
✝️- أولاً : هذا الأب الراعي
مشهور بتعاليمه النقية الأرثوذكسية السليمة مع تقوى وسيرة نقية ..
ثانياً : لا ننكر إن استخدام هذا النص للتدليل على إنه يخص أوبئة ومن ضمنها كورونا
هو بالطبع خطأ ..!
لكن مش خطأ عقيدي ..!
ولكل جواد كبوة ..!
🤔- طيب ليه خطأ ؟؟!
✝️- علشان مينفعش كل ما تحصل حرب نقول :
" يبقى هي دي نهاية العالم
زي ما قال الكتاب هتسمعوا بحروب "
الكلام دا حصل لما وقعت الحرب العالمية الأولى والتانية ..!!
وانتظر الناس نهاية العالم
ومنتهاش ..!
والبعض تشكك
في صدق الكتاب المقدس ..!!
مع ان العيب فيمن فسر
مش في النبوءات نفسها ..!!
كذلك نفس الشيء مع كورونا
مش كل مرة هييجي وباء نقول :
" تبقى دي نهاية العالم كما قال الكتاب هيكون في أوبئة " !!
الطاعون الأنطوني سنة 165 م
تسبب في وفاة 5 مليون شخص ..!
ودا رقم كبير جداً وقتها ..!
والناس ظنت ان دي نهاية العالم ..!
الطاعون الأسود سنة 1347 م
قتل 200 مليون شخص ..!
( تلت أوروبا اختفى وقتها ) ..!
وقالوا دي مؤكد نهاية العالم ..!
والإنفلونزا الأسبانية سنة 1918
تسببت في موت 50 مليون شخص .!
وقالوا نفس الكلام ..!
🤔- تمام ..
بس إزاي نحدد الأوبئة اللي بتدل على نهاية العالم من الأوبئة العادية ؟؟!
✝️- دا سؤال جميل ..
أولاً : هتكون " اوبئة " مش وبأ واحد .!
وبالتأكيد هتكون أوبئة فتاكة جداً ..
ثانياً : ودا الأهم
لازم تتحقق الأول :
{ علامات المجيء الثاني }.
- اللي هما إيه ؟؟!
- اقولك :
١- إنتشار الإنجيل في العالم كله
ودا حصل ..!
٢- إيمان اليهود بالمسيح
ودا محصلش لسه ..!
٣- ظهور الوحش ..إنسان الخطية ..
٤- الإرتداد العظيم ..
٥- نزول إيليا واخنوخ ..
٦- الضيق العظيم
في مرحلة الضيق العظيم دي
هتكون الحروب والمجاعات والأوبئة ..
لما تحصل الخطوات السابقة
وتيجي أوبئة وحروب ومجاعات
ساعتها بس نقدر نقول :
هي دي بداية نهاية العالم ..!
كما قال الرب بنفسه :
"هكَذَا أَنْتُمْ أَيْضًا، مَتَى رَأَيْتُمْ هذَا كُلَّهُ فَاعْلَمُوا أَنَّهُ قَرِيبٌ عَلَى الأَبْوَابِ."
( متى 24 : 33 ).
🤔- هو دا الكلام ..!
كدا الأمور وضحت تماماً ..
العلامات أولاً ..
وبعد ذلك " مبتدأ الأوجاع "
اللي هو الحروب والزلازل والأوبئة .
🤔- طيب سؤال دقيق شوية
لما أنت بتحدد ان النبوءة دي
هتحصل مع فلان دا بالتحديد
مش دا تقييد لكلمة ربنا ؟؟!
مش المفروض ان كلمة ربنا
لا يحدها زمان أو مكان ؟؟!
✝️- يااا صديقي ..
أولاً : مش أنا اللي حددت إن النبوءة دي تنطبق على الشخص دا ..
دا الوحي هو اللي حدد ..!
علشان كدا كان لما تتحقق نبوءة
الكتاب يقول :
"لِكَيْ يَتِمَّ مَا قِيلَ
بِإِشَعْيَاءَ النَّبِيِّ الْقَائِلِ:"
(متى 12 : 17 ).
ولما حل الروح القدس على التلاميذ
وبقيوا بيتكلموا لغات متنوعة
والناس افتكروهم سكرانيين ..!
بطرس الرسول وضح الموقف وقال للناس ان اللي بيحصل دا هو تحقق لنبوءة يوئيل النبي :
"لِيَكُنْ هذَا مَعْلُومًا عِنْدَكُمْ
وَأَصْغُوا إِلَى كَلاَمِي،
لأن هؤُلاَءِ لَيْسُوا سُكَارَى كَمَا أَنْتُمْ تَظُنُّونَ، لأَنَّهَا السَّاعَةُ الثَّالِثَةُ مِنَ النَّهَارِ.
بل هذَا مَا قِيلَ بِيُوئِيلَ النَّبِيِّ..."
( أعمال الرسل 2 : 14 - 16 ).
فالنبوءات هدفها إنها تتحقق في زمن محدد مع شخص محدد
لكن كلام ربنا ووصاياه وتعاليمه
دي صالحة لكل زمان ومكان ..
يعني وصية :
"أَكْرِمْ أَبَاكَ وَأُمَّكَ لِكَيْ تَطُولَ أَيَّامُكَ عَلَى الأَرْضِ الَّتِي يُعْطِيكَ الرَّبُّ إِلهُكَ.
لا تَقْتُلْ.
لا تَزْنِ.
لاَ تَسْرِقْ.
لا تَشْهَدْ عَلَى قَرِيبِكَ شَهَادَةَ زُورٍ."
( خروج 20 : 12 -16 ).
كل الوصايا دي مازالت - وسوف تظل -
سارية إلى المنتهى .!
النبوءات يا صديقي
ليست وصايا أدبية أو تعاليم روحية .
🤔- تمام ..
وضحت كدا ..
اشكرك
✝️- الله يسندك .
تحياتي ومحبتي لك .
ليست هناك تعليقات:
إرسال تعليق