هحكي لكم عن سبب اصابتي بكورونا و عن سبب انهيار مناعتي بالشكل الغريب السريع اللي حصل علشان بس نتعلم مع بعض حاجة مهمة جدا جدا .. اننا ممكن نتحول لقتلة في لحظة .. لحظة واحدة بس بتفصل بين حياة او موت انسان .. هكتب بوستين هفضل ابدأ بالنتيجة و بعدين هكتب بوست اشرح فيه الاسباب
اليوم اللي كتبت فيه بوست عندي كل اعراض كورونا ما عدا الحرارة كانت البداية .. حسيت بكل الاعراض ما عدا الحرارة تاني يوم الحرارة وصلت ٤٠ .. اتاكدنا ان في كارثة هتبدأ .. اتصلت باتنين اطباء قريبين مني جدا و تم تحويل البيت لمستشفي منزلي علي اعلي مستوي .. شارك معي لحظة بلحظة العظيم في الاصدقاء باسم نادر Bassem Nader ..اللي لو ربنا كتبلي عمر جديد مش هقدر اوفي جميله .. باسم بالاشتراك مع باقي الاطباء تحول لطبيبي الشخصي الملازم لي كظلي ٢٤ ساعة في اليوم و بمساعدة ابني بولا بطل الابطال بجد اللي وهب حياته لاجلي و هو بيعالجني بايده بمنتهي الشجاعة العلمية و يجري يجيب علاج و يجري يشيل علي اكتافه انابيب اوكسجين.. بدأت اتعالج بافضل علاج نزل مصر و بدات اتحسن لان ارادتي حديد و ايماني ان ربنا هينجيني متهزش خردلة
و كتب انتظروني انا راجع بقوة .. و فعلا التحسن كان اعجازي و السبب الوحيد المؤكد لعلاج كورونا هو الحالة النفسية السليمة .. في اليوم ده جالي خنجر في الضهر مش مهم اتقال ايه لكن المهم اتقال من مين !!
حصل انهيار كامل لمناعتي بطريقة اسرع من السحر خلال ساعات معدودات انهار كل المجهود اللي عملته انا و باسم و بولا لدرجة كانت هتجنن باسم نادر .. الانهيار كان رهيب و سريع و فشلت كل محاولات رفع المناعة اللي هي اساس اساس اساس التغلب علي كورونا .. و انهارت الرئتين بشكل كامل و بدأت رحلة المستشفيات
بكتب الكلام ده لسببين :
الاول نصيحة من مصاب بكورونا لكل اخواته في العالم كله و بعون الله احنا اتصيتنا قوي في الكوروناو بقت سمعتنا علي كل لسان .. حالتك النفسية هي ٩٥% من علاجك .. ثق تماما انت اقوي من الكورونا و هتخف يعني هتخف
السبب التاني اياك تشارك في قتل سمعة انسان حتي لو عدوك اللدود لانك مش هتقدر تتعايش مع ضميرك لما تكون سبب ضرر لاخوك الانسان
انا في مستشفي العزل بين ايد ربنا .. واثق اني هقوم رغم الرئة الضايعة و رغم العذاب الرهيب .. هقوم
ليست هناك تعليقات:
إرسال تعليق