د/شريف حسين
رسميا بقينا في الموجة الثانية من كورونا بمعدل مئات الاصابات يوميا وده طبعا غير الأعداد الغير رسمية
و طبعا الاسبوعين القادمين ... والفترة القادمة قد تكون أهم فترة صعبة هتعدي على مصر في ازمة كورونا ..
و من المحتمل أن نري جميعا عائلات قريبة مننا فيها مصابين بالكورونا أو حالات وفاة ومن المتوقع أن نفقد أحبابا لنا كما فقدنا نحن أيضا في عائلتنا
الفيروس رجع تاني بقوة وبسرعة وبقى حرفيا في كل مكان في مصر .
و عشان كده الأسبوعين القادمين والفترة القادمة
هما بجد فترة ( الإختيار )
اللي هيحصل سيناريو واحد من اثنين ...
السيناريو الاول :
الناس هتستمر في الاستهانة بالموضوع .. و هيستمروا في اقناع نفسهم ان الموضوع بعيد و عند الناس التانيين و هيستمروا في الاهمال و التعامل مع الموضوع على انه حرب اعصاب وانه بعيد عننا وان الوفيات قليلة وان الشباب بعيدة عن كل ده
و انهم انصح من كل اللي حواليهم ...
السيناريو ده هيكون معناه ان اللي هيتصاب هيعدي كل بيته و جيرانه واصحابه .. و حتى اللي واخد احتياطاته هتبقى معركته اصعب و حمايته اصعب .
ده نفس السيناريو اللي حصل في بلاد كثير زي فرنسا ..
الناس خدت اجازات .. نزلت زيارات منزلية وأعياد و عملوا تجمعات وحفلات ..
وفي لحظه واحده البلد بتصحى على آلاف المختنقين، التهاب رئوي حاد، الفيروس بيدمر الحويصلات الهوائية.
الآلاف يتدفقون على المستشفيات..
في مركز الانفجار بفرنسا معظم المستشفيات امتلأت، كل ما يمكن تحويله لمستشفى امتلأ، ده غير مدينة مثل كاليفورنيا رجعو اليوم وفرضو حذر تجوال ومتوقع في بلاد كثير ترجع تقفل وتعمل اغلاق تاني واحتمال نرجع نشوف مستشفيات ميدانية في خيام..
كما شاهدنا سابقا في وقت من الأوقات امتلاء غرف العناية المركزة وكل أجهزة التنفس الصناعي، وكل أقنعة الاوكسجين..
وسابقا شفنا بلاد كثير كان عندهم قرارات اختيارات الحياة .. كالحروب تماماً. بشكل ميداني تم لديهم تطوير بروتوكول ان كل من عمره فوق ٦٥ سنة، وكل الي تحت ٦٥ وعنده حالة مرضية مصاحبة يسيبوه يختنق حتى الموت!!
وشاهدنا سابقا أطباء يبكون وهم يبلغون مرضى أنه لا يتوافر حتى قناع اوكسجين.
ونشاهد هذا الايام نسب الاصابات و الوفيات ترتفع يومياً في البرازيل وفرنسا والهند واسبانيا
وسجلت أمريكا النسبة الاعلى عالميا!
*السيناريو الثاني :
ان الناس تفهم خطورة الموقف الحالي ..
وان لقاح كورونا قدامه شهور عشان يكون متوفر في بلدنا
عشان كده ضروري اللي عارف يقول للي مش عارف .. و اللي فاهم يقول للبسيط .. وكل واحد يسيطر علي اسرته وعياله و اللي عنده سلطة ينفذها و يجبر الناس اللي يقدر عليهم انهم يلتزموا بجميع الإجراءات الاحترازية عند خروجهم خارج المنزل بحذافيرها .
السناريو ده .. هو سيناريو الوعي ..
ده نفس السيناريو اللي اطبق في الصين ... نفس السيناريو اللي خلى مقاطعة ووهان اللي كانت هي المنبع .. انها تحتفل انها خالية من الفيروس ...
وكمان كوريا الجنوبيه سيطرت بدرجه مزهله !
الموضوع حسبته بسيطة .. الفيروس مدة احتضانه ١٤ يوم .. لو سيطرنا على نفسنا كمجتمع الفترة القادمة
٣ اسابيع .. الازمة المنتشرة دلوقتي. هتقل .. لان لو كله التزم .. المصابين هيبقو محدودين و يبقي سهل يلاقو رعايه و يخفو ...
و اللي بيحافظ على نفسه تبقى مهمته اسهل عشان كل اللي حواليه فاهم و بيتعاون .
دورك دلوقتي انك تختار السيناريو المناسب ليك .. لو ليك اي سلطة او صوتك مسموع .. وصل صوتك و عرف
اللي حواليك ان المعركة عايزة كل شخص ..
نلاحظ المستشفيات رجعت تاني تستقبل حالات كثير وبدأت تبقى مليانة وقريبا هنسمع وهنشوف صعوبة شديدة ان في حد يلاقي مكان وان العزل المنزلي هيكون الحل لمعظم الناس وان الفريق الطبي قريبا هيواجه مرحلة من مراحل الانهيار لاننا رجعنا تاني نسمع كل يوم دلوقتي حالتين ثلاثة بنفقدهم من الفرق الطبية
و ان موقفه السلبي ممكن يتسبب في عدوى لولاده او بيته او زمايله في الشغل .
احنا دلوقتي في نفس
مرحلة الإختيار
اللي اتحطت فيه كل الدول اللي قبلنا ... و مع انه هو نفس الفيروس ... لكن كل دولة حصل فيها حدوتة مختلفة على حسب رد فعل شعبها .. و هل فهموا ووقفوا مع بعض و قاوموا الجهل و قاوموا الاهمال ولا لأ
كلنا دلوقتي عارفين اعراض الكورونا وعارفين نلتزم ازاي وعارفين وحافظين الوقاية الذاتية ازاي ولازم كلنا نساعد بعض ونوعي بعض
وخليكم فاكرين ...
في دولة احتفلت بانتهاء الفيروس من مجموعة من مقاطعاتها (محافظاتها)
وفي دولة قالت لشعبها .. ودعوا من تحبون .. فالنهاية قادمة!!
وكنا في الموجة الأولى من شهور بنقول خليك في بيتك
دلوقتي رجعنا تاني بنقولك
خروجك عند الضرورة بكل الاحتياطات المعروفة بحذافيرها وبدون أى تراخي في اجرائات الوقاية
وخروج كبار السن أو زيارتهم بدون داعي ممنوع
وخروج مرضى القلب والامراض المزمنة يتم بجميع الاجراءات الاحترازية
وأهم حاجة أرجوكم دعم معنوي للفرق الطبية المنهكة في المستشفيات وخصوصا مستشفيات العزل المتوقع امتلائها في الاسابيع القادمة
#احمي_نفسك_واهلك
#تطبيق-جميع الإجراءات الاحترازية
ملاحظة هامة الدولة وفرت مستشفيات عزل كثيرة وخدمات علاجية لمرضى الكورونا ده غير العزل المنزلي للحالات البسيطة
ومازال في مستشفيات كثير ممكن تتحول الى عزل
ولو التزامنا بإذن الله مش هنحتاج مستشفيات تانية تتحول لعزل
ليست هناك تعليقات:
إرسال تعليق