اخد الحق حرفة (خد حقك علي الهادي)

 

د.مجدى إسحق

الغضب و الثورة و التلاسن و العنف خسران ، لأن كل هجوم له هجوم مضاد ، و كل فعل غير محسوب له رد فعل غير محسوب ..

واحد شتمك و انت شتمته ، كده خلصت ؟؟ خد عندك شتايم اكتر و سب و لعن و ضرب و انتقام و شر يبات و يزداد و يتعاد..

واحد هاجمك علي مواضع التواصل الاجتماعي و شّهر بيك، فأنت رديت و هو رد و بقت معركة .. كده خلصت ؟؟ فضايح و تجريس و قلة قيمة ..

و كلنا عارفين الغضب و الغباء دايما أصحاب..

لكن اخد الحق عاوز بال رايق و أعصاب هادية و تدبير حكيم..

لو ما عرفتش ترد بحكمة ، يبقي عدم الرد أقوي من الرد المندفع..

عدم الجدال مع الاغبياء دليل علي ذكاءك .. كده بتديله قيمة و تشهره و تخليه معروف ، و المثل الصعيدي بيقول "انفخ في ودن الحمار (عفوا ) تكبر " .. يعني ما تديلوش قيمة و ما تتعبش اعصابك و سيبه يتحرق بغيظه..

التجاهل و المقاطعة المدروسة افضل من المواجهة لاحمق انت جربت عرفت انه ح يزداد غباء كل ما تكلمه أو تعاتبه أو حتي تحاول توضحله رايك ..

نجاحك و تفوقك يحطم عدوك من كتر غيظه منك لأنه بيتمني فشلك.. مرات نجاحك يبقي سلاحك اللي بيقضي علي احلام اللي بيكرهوك.. هم بيتمنوا سقوطك و انت و علي فوقهم بنجاحك..

في كل ده خليك كبير و كبير قوي ..

لا تحقد و لا تحسد و لا تتكلم علي حد بكلام وحش ..

و لو حد من اللي بيضايقوك جالك و اعتذر (و ده نادر النادر ) ، صحيح حرص منه و ما تديلوش امان الا بشروطك ، لان اللي باعك مرة ح يبيعك ١٠٠ مرة ، بس خليك اشرف منه و حبه و أكرمه و سامحه و احسن له ، بس "من بعيد لبعيد" ..