شوية نقط

 

صفوت يوسف يكتب

في ناس بتمشي جنب الحيط لغايه ما الحيطه وقعت عليهم " الاستسلام والخنوع والخضوع " تسلب الانسان حريتة وايضا تصنع عقدة نفسيه اسمها الخوف .. الخوف بيعمل ايه بيخلي العقل مشحون دايما " خايف " الخوف بيخلي القلق هو عنوان كل حاجه قلقان من نفسه وقلقان من الماضي ومن الحاضر ومن المستقبل ودماغه تودي وتجيب والقلق اللي جاي زي العاصفة من الخوف بيخلي الانسان مش مستقر وكل موقف او حدث او واقعه يفسرها من منطق القلق اللي بينغص حياته وكل فعل خايف يعمله .. نفسه يغامر بس خايف .. نفسه يعيش بس خايف .. نفسه يجرب بس خايف .. نفسه يعبر بس خايف .. خايف مش مجرد كلمة لا طبعا بمرور الوقت تحولت الي عجز كامل وعشان يتحرر منه ويتخلص من توابعه مثل القلق محتاج حاجات كتير منها ميفكرش في الحيط ولا السور ولا الحاجز النفسي اللي عمله وميفكرش علي مفيش لان في نوعيات تفكر كتير اوي وتحسب كتير اوي وكله يطلع بلح او في الهوا زي طواحين الهوا او المكنه اللي مطلعتش قماش اول قواعد التفكير انك تفكر بواقعيه وتحط نقط اودامك عشان تعرف توصل سكك بينهم وتحسب امكانياتك وتشوف نقاط الضعف فين تنميها وتقويها ونقاط القوة فين عشان تطورها وده مستحيل يحصل الا وانت متحرر من الخوف اللي عامل عقدة وكلكيعه ومانعه سريان المياة في مجاريها .. القلب الشجاع بيحب الحياه والتجريب وروح المغامرة .. العقل الشجاع باحث عن المعرفة اللي بتحقق الحياة وطرق العيش فيها والمعرفة هنا مش علي طريقة " شارلوك هولمز او المخبر السري او جيمس بوند " المعرفة ان تعرف الحياه ومتطلباتها وازاي تتخلص من معوقاتك النفسيه وعاداتك وطباعك وتفكيرك وهواجسك ومخاوفك وفشلك واحباطاتك اللي زرعت في كل حاحه خميرة اسمها الخوف وخلينا جنب الحيط .

مستحيل يحصل تغيير في السلوك الا لو حصل تعديل وتغيير في العقل نفسه ومستحيل تتغير الافكار الا من خلال العقل واهمال العقل او تشبعه بكل ما هو سلبي او ادخال افكار مفيرسة بتعمل خلل عام عقل معطل افكار خربة سلوك مضطرب والنتيجه زي الفل انسان معتوة او مغيب او فاقد الاهلية .. غير عقلك يتغير فكرك ويتغير السلوك اللي نابع من العقل وثق انك حتشوف الحياة بشكل تاني .. كتير من العادات ضارة زي السم في العسل وكتير اوي من اللي اتعودنا عليه اصلا غلط ومستمرين عليه بحكم العادات اللي تحولت الي كيزان نشا نشفت واتجمدت ..وكتير من اللي بنعمله في يومنا من غير هدف او بمعني ادق قول يا باسط خليها تحلي واهي المركب ماشيه واحنا ماشيين ووقت بيمر عادي خالص .. وعشان كل ده تلاقينا عشوائيين في كل حاجه نفتكر بس اننا منظمين اول ما نلاقي حد بيتكلم عن التنظيم والترتيب او اول ما نروح نقدم علي وظيفه او نقدم علي منحه شروطها ان الشخص يكون منظم وفي النهاية منعرفش غير منظم انبوبة البوتجاز او منظم ضربات القلب .. دي شوية نقط وكل فترة ننقط شوية لعل من التنقيط تكون في حياة .