صفوت يوسف يكتب :
هو ازاي ممكن تثق في نوع من الناس بيغير مواقفه في كل دقيقه ويقول كلام وعكسه ويمدح في ناس ويذم فيهم ويتعاملوا مع ناس كانوا بيشتموا فيهم وينضموا لناس يمدحوا فيهم وينقلبوا علي ناس كانوا معاهم وحياتهم اما نميمه او ضرب تحت الحزام
.. ازاي ممكن تثق في ناس شغالين علي كل لون واللي معاهم النهارده بكرة ضدهم واللي كانوا ضدهم اصبحوا معاهم وفي وقت المصالح احنا زي الفل والكلام يكون شهد ووقت الخصام تنهمر اللعنات وتتسن السيوف
هو ازاي في ناس كده بتتلون بالف وش وهما الماده الخام للنفاق والرياء وكل حاجه في حياتهم مبررة
ازاي ممكن تثق في ناس ظاهرها فعل الخير وهم غيلان وبيمثلوا التقوي والورع ولا يعرفوا حاجه عن الخير الا وقت ما يتحرجوا وسط الناس في ناس ممكن تتبرع لجهة او وزارة عشان اسمهم بس يرن ويسمع ولو جه واحد حيموت اودامهم يعملوا مفتحين عليه
ازاي ممكن تثق في ناس تدعي الفضيله وتمسك السبحه " زي كده ذكي رستم اللي كان عامل نفسه شيخ في فيلم رصيف نمره خمسه " ويطلع في النهايه تاجر مخدرات "
ازاي ممكن تثق في ناس بتتكلم عن الامانه والشرف والنزاهه وهم بيسرقوا اموال اليتامي وبيتاجروا بالمرضي وبيبيحوا لنفسهم كل حاجه وكل شغلهم اما اشتغالات او تأمرات او فخاخ او حلبسه
ازاي ممكن تثق في ناس من بره شكل ومن جواهم شكل تاني يقابلوك بالاحضان ومن وراك سكاكين واللي اتعمل معاك يتعمل مع غيرك واللي حصل مع خيرك يتلف الشريط من تاني
ازاي ممكن تثق في ناس بتدعي الوطنيه وانهم بيحبوا بلدهم وكل واحد شايف البلد هي الوزير او المحافظ او السفير او عضو في مجلس النواب والبلد بالنسبه له هو اللي قاعد علي الكرسي ويفضل يدافع عن الشخص ده او المسئول ده ويمدحه وينفخه عشان عاوز منه حته من الكعكه
ازاي اثق في كلام مسئول وهو بيعمل عكس تصريحاته زي ناس كتير .. يطلع واحد ان السنه دي حتتحل ازمة المرور ومتتحلش وحد يقولك احنا بنتجه للدوله الرقميه والناس طوابير علي ماكينات atm لصرف المعاشات في مشهد مأساوي وازاي عاوزين نسجل الثروه العقاريه وكل مكاتب الشهر العقاري منهارة وسيئه جدا واللي بيطلع بس توكيل بيدوخ سبع دوخات
ازاي نثق اننا نعمل قطار كهربائي ب 300 مليار ومش عارفين نصرف علي السكة الحديد 250 مليار
ازاي ممكن تثق في ناس ملهاش مبدأ ولا قيمة ولا فضيله ولا رحمة ولا امانه ولا صدق وزي ما بتجمعهم موائد الاكل تجمعهم كمان الخيانات والغدر
ازاي ممكن تثق في ناس طول الوقت رافعه شعارات واغاني وتجامل علي حساب الحق وشغالين تصنيفات في الناس
ازاي ممكن تثق في نصاب او حرامي ممكن يوصل فلوس وامانه لاصحابها
حاجات كتير جدا بنعملها ونعمل عكسها فازاي ممكن نثق في النوعيات دي ؟
انت تخاف من النوعيات دي لانها ملهاش امان ومتصدقش كلامهم ولا افعالهم لان الوحيد اللي ممكن يظهر في شكل ملاك هو الشيطان .
ليست هناك تعليقات:
إرسال تعليق