صفوت يوسف يكتب :
حادث انقلاب قطار اليوم وفي شهر رمضان المبارك قطار الغلابة سكان الاقاليم وثاني حادث في شهر واحد
منظومة النقل فاشلة والاولويات التي يتم وضعها للقطار الكهربائي او غيره من المشروعات ويتم تطوير السكه الحديد ببطء شديد
دم الغلابة والابرياء والمطحونين في رقبة من ؟
والشعب حيعمل ايه اكتر من كده .. يشوف اعلانات تحرق الدم تنفق عليها الملايين ويُصمد .. يسمع اسعار الفيلل والقصور والمنتجعات والكومباوندات اللي بالملايين ويتحمل الضغط والسكر والجلطات ويكتفي بمصمصة الشفايف ويقول في سرة لا حول ولا قوة الا بالله ادينا عايشين والحمدالله .. شعب يسمع اسعار الفنانين والمطربين اللي بالملايين وهو محروم من كيس قطن في مستشفي او زجاجة محلول .
الشعب ده اللي 106 مليون مش الاتنين مليون اللي عايشين في التجمع والشيخ زايد ولا القاهره الجديده او مدينتي او الساحل الشمالي او العلمين
الشعب ده اللي بيُطلب منه بيعمله ويقول انا تحت امر بلدي .. يتقال له انزلوا انتخابات ينزلوا .. عاوزين ندعم مشروعاتنا القوميه يقف ويسند .. الشعب الحقيقي ده هو اللي سند مصر وواقف في المحن والضيقات صامد متحمل الغلاء وارتفاع الاسعار وكل الاصلاح الاقتصادي اللي تم .. بس اول ما يدهس ويموت علي السكك الحديد او الطرق وحوادث متكررة ويفشل كل الوزراء بما فيهم رئيس الوزراء لوضع حلول حاسمة لتلك الحوادث الامر يحتاج الي وقفه واولويات الدوله هي الشعب والسكه الحديد اللي هي روح الشعب.. كفايه لجان تقصي حقايق او شويه استجوابات تتعمل لوزير النقل او رئيس هيئة السكة الحديد او شويه اعلاميين يسخنوا شويه وفي حدود المرسوم والمتاح ليهم وبعدين تأتي التبريرات والتماس الاعذار ودايما احنا نقارن في كل الاحداث باللي اقل مننا في كل حاجه عشان تتجلي انوار اعمالنا وسط ظلام الدول اللي اقل مننا .. لازم نحس بالشعب الغلبان اكتر من كده ونراعي متابعه ومحنه وضيقه وازماته ولكن كل فترة حوادث واموات ومصابين كتير ويتناقض مع التحولات اللي عاوزينها في المستقبل .
ليست هناك تعليقات:
إرسال تعليق